அமெரிக்காவின் வரி: இலங்கையின் பொருளாதாரத்திற்கு அச்சுறுத்தல்!

இலங்கையின் பொருளாதாரத்திற்கு அதிர்ச்சியை ஏற்படுத்தக்கூடிய முக்கிய செய்தி வெளியாகியுள்ளது. அமெரிக்கா, இலங்கையிலிருந்து இறக்குமதி செய்யப்படும் சில முக்கிய பொருட்கள்மீது 44% வரி விதித்துள்ளது. இது, இலங்கையின் முக்கியமான ஏற்றுமதி சந்தையாக இருப்பது மட்டுமல்லாமல், நாட்டின் மொத்த வர்த்தக வருவாயில் அமெரிக்காவின் பங்கு குறிப்பிடத்தக்க அளவில் உள்ளதைப் பொருளாதார நிபுணர்கள் சுட்டிக்காட்டுகின்றனர்.

அமெரிக்க ஜனாதிபதி டொனால்ட் டிரம்ப் மேற்கொண்ட இந்த திடீர் நடவடிக்கை, இரு நாடுகளுக்கிடையிலான வர்த்தக உறவில் புதிய பதற்றங்களை உருவாக்கியுள்ளது. 2024 ஆம் ஆண்டு புள்ளிவிவரங்களின்படி, இலங்கை தனது மொத்த ஏற்றுமதியின் சுமார் 23% ஐ அமெரிக்காவிற்கு அனுப்பியுள்ளது. இதில், ஆடைத் துறை மட்டும் 70% க்கும் அதிகமாக பங்களித்து, சுமார் 3 பில்லியன் டொலர் வருமானத்தை உருவாக்கியுள்ளது.

இந்த நிலையில் 44% வரி உயர்வு, குறிப்பாக ஆடை உற்பத்தியாளர்கள் மற்றும் ஏற்றுமதியாளர்களுக்கு பெரும் சவாலாக அமைந்துள்ளது. விலை அதிகரிப்பால், அமெரிக்க சந்தையில் இலங்கையின் பொருட்கள் போட்டித் திறனை இழக்கும் அபாயம் அதிகமாக உள்ளது. இதனால், ஏற்றுமதி குறையும்; தொடர்ச்சியாக, நாட்டின் வெளிநாட்டு நாணய வருமானம் மற்றும் பொருளாதார வளர்ச்சி பாதிக்கப்படும் என நிபுணர்கள் எச்சரிக்கின்றனர்.

அதிக வரி சுமையால், சிறு மற்றும் நடுத்தர நிறுவனங்கள் மிகவும் பாதிக்கப்படலாம். இது வேலை இழப்புகளும் தொழில் நிறுவனங்கள் நிரந்தரமாக மூடப்படுத்தல் போன்ற எதிர்மறை விளைவுகளை உருவாக்கும் வாய்ப்பை ஏற்படுத்துகிறது. ஏற்கனவே நெருக்கடியான பொருளாதார சூழலில் தவித்து வரும் இலங்கைக்கு இது மேலும் அழுத்தத்தை உருவாக்கும் எனவும் கருதப்படுகிறது.

இந்த நிலைமையை எதிர்கொள்வதற்காக, இலங்கை அரசு அவசர நடவடிக்கைகளை எடுக்கத் தொடங்கியுள்ளது. இதற்காக ஒரு சிறப்பு குழு நியமிக்கப்பட்டுள்ளதாகவும், அவர்கள் அமெரிக்க அரசுடன் நேரடி பேச்சுவார்த்தை நடத்த உள்ளதாகவும் தகவல்கள் தெரிவிக்கின்றன. மேலும, சர்வதேச நாணய நிதியமும் (IMF) இந்த நெருக்கடிக்கு தீர்வுகாணும் நோக்கில் ஆழ்ந்த ஆய்வுகளில் ஈடுபட்டு வருகிறது.

எதிர்காலத்தில் இந்த பிரச்சனைக்கு ஏதேனும் தீர்வு கிடைக்குமா? அல்லது இலங்கை பொருளாதாரம் மேலும் சிக்கலுக்கு உள்ளாகுமா? என்பதை காலமே நிர்ணயிக்க வேண்டும். இந்நிலையில், ஏற்றுமதியாளர்கள் மாற்று சந்தைகளைத் தேடுவது மற்றும் உற்பத்தி செலவுகளை குறைக்கும் முயற்சிகளை மேற்கொள்வது அவசியமாகியுள்ளது.