அமெரிக்கா தனது வர்த்தக கொள்கையில் சமீபத்தில் ஒரு தற்காலிக மாற்றத்தை மேற்கொண்டு, ஐரோப்பிய ஒன்றியத்தின் மீது விதித்திருந்த சில முக்கிய வரிகளை 90 நாட்களுக்கு இடைநிறுத்தியுள்ளது. குறிப்பாக, இரும்பு, அலுமினியம் மற்றும் வாகனங்கள் போன்ற முக்கிய பொருட்களுக்கு விதிக்கப்பட்ட 25% வரி, மற்றும் பிற தொழில்துறை பொருட்களுக்கு விதிக்கப்பட்ட 10% வரிகள் மீது இந்த இடைநிறுத்தம் அமுலில் வந்துள்ளது.

இது பற்றி பிரான்ஸ் ஜனாதிபதி இம்மானுவேல் மக்ரோன் ஏப்ரல் 10 ஆம் தேதி தனது X (twitter) தளத்தில் “இது ஐரோப்பிய ஒன்றியம் மற்றும் அமெரிக்கா இடையே நடைபெறும் வர்த்தக பேச்சுவார்த்தைகளுக்கு ஒரு வாய்ப்பாக கருதப்படுகிறது. எனினும், இந்த இடைநிறுத்தம் ஒரு நிரந்தர தீர்வாக முடியாது மேலும் உறுதியற்ற நடவடிக்கையாக உள்ளது” என எச்சரித்துள்ளார்.
மேலும்
“இந்த இடைநிறுத்தத்தை ஒரு முன்னெச்சரிக்கையாகவே பார்க்க வேண்டும். ஐரோப்பா எப்போதும் பதிலடி கொடுக்க தயாராக இருக்க வேண்டும்.” எனவும் குறிப்பிட்டுள்ளார்.

தற்போதைய வரி விதிப்புகள் காரணமாக, ஐரோப்பிய தொழில்துறைக்கு வருடத்திற்கு சுமார் 52 பில்லியன் யூரோ அளவிலான பொருளாதார இழப்பு ஏற்படுகிறது. இது வேலைவாய்ப்புகளுக்கும், தொழில்துறை வளர்ச்சிக்கும் நேரடி பாதிப்புகளை ஏற்படுத்துகிறது.

இது தொடர்பில் மக்ரோன் மேலும் கூறியதாவது:
“இந்த வரிவிதிப்புகள் ஐரோப்பிய தொழிலாளர்களின் எதிர்காலத்தை அச்சுறுத்துகின்றன. ஐரோப்பா வலிமையாக பதிலடி கொடுக்க வேண்டும். இந்த அனியாய வரிகளை முழுமையாக நீக்குவதே நியாயமான தீர்வாகும். பிரான்ஸ் உள்ளிட்ட நாடுகள் அதற்காக உரையாடலுக்கு தயாராக உள்ளன.”

இந்த நிலையில், ஐரோப்பிய ஒன்றியம் உலக வர்த்தக நிறுவனத்தின் (WTO) சட்டங்களை அடிப்படையாகக் கொண்டு தனது நிலைப்பாட்டை வலுப்படுத்த முடியும். மேலும், இது அமெரிக்காவின் வர்த்தக பாதுகாப்பு (trade protectionism) நோக்கங்களை மீண்டும் விவாதிக்க ஒரு சூழலை உருவாக்கியுள்ளது.

அளவீட்டற்ற வரிவிதிப்புகள் போன்ற நடவடிக்கைகள், உலக பொருளாதாரத்திலும் நிச்சயமற்ற நிலையை உருவாக்கக்கூடியதாகும். இந்த 90 நாள் இடைநிறுத்தத்தின் பின்னர் அமெரிக்காவின் அடுத்த நடவடிக்கை என்னவாக இருக்கும் என்பதையும், ஐரோப்பா எப்படி பதிலளிக்கப்போகிறது என்பதையும் உலகம் ஆவலுடன் எதிர்நோக்கி காத்திருக்கின்றது.

பாரிஸ், ஏப்ரல் 11, 2025 – பிரான்ஸின் பரிசின் மேற்குப் பகுதியில் அமைந்துள்ள Issy மெற்றோ நிலையம், பயணிகள் பாதுகாப்பு காரணங்களால் மறு அறிவித்தல் வரை தற்காலிகமாக மூடப்பட்டுள்ளது என்று SNCF (Société Nationale des Chemins de fer Français) – பிரான்சின் தேசிய தொடருந்து நிறுவனம் – அறிவித்துள்ளது.

📅 எப்போது மூடப்பட்டது?
இந்த மெற்றோ நிலையம் ஏற்கனவே ஏப்ரல் 10, 2025 அன்று மூடப்பட்டிருந்ததாக பயணிகள் சமூக ஊடகங்கள் வழியாக புகாரளித்தனர். இந்த தகவல்களினடிப்படையில், விசாரணை மேற்கொண்ட செய்தியாளர்கள், SNCF அதிகாரிகளூடாக குறித்த மெற்றோ நிலையம் மூடப்பட்டுள்ளதை உறுதிப்படுத்தினார்கள்.

⚠️ எதற்காக மூடப்பட்டது?
SNCF தெரிவித்ததாவது, கடந்த சில நாட்களாக நிலத்தடி சுரங்கப்பாதைகள் திருத்தப்பட்டு வருகின்றன. இத்தருணத்தில், சட்டவிரோதமாக தண்டவாளத்தை கடந்து பயணித்த சம்பவங்கள் இடம்பெற்றுள்ளன. இது மிகவும் ஆபத்தான நிலைமை என்றும், பயணிகள் மற்றும் ஊழியர்களின் உயிருக்கு அபாயம் ஏற்படக்கூடியதாக இருந்ததால், நிலையத்தை மூட வேண்டிய கட்டாயம் ஏற்பட்டதாகவும் தெரிவித்துள்ளனர்.

🛤️ பாதிக்கப்பட்ட சேவைகள்
இந்த மெற்றோ நிலையம் மூடப்பட்டதால் RER C தொடருந்து சேவை நேரடியாக பாதிக்கப்பட்டுள்ளது. குறிப்பாக, இந்த வழித்தடத்தை வழக்கமாகப் பயன்படுத்தும் பயணிகள் தங்கள் பயண திட்டங்களில் மாற்றங்களை செய்ய வேண்டிய நிலை ஏற்பட்டுள்ளது.

🛠️ திருத்தப்பணிகளும் பயணிகள் மீது அதன் தாக்கமும்
Issy மெற்றோ நிலையத்தில் நடைபெறும் சுரங்கப்பாதை திருத்தப்பணிகள் காரணமாக, சில பகுதிகள் தற்காலிகமாக பயணங்களுக்கு மூடப்பட்டுள்ளன. ஆனால், இது பற்றிய சரியான தகவல்கள் கிடைக்கப்பெறாத காரணத்தால் சில பயணிகள் தண்டவாளத்தை கடந்து தங்கள் பயணத்தை தொடர முயற்சித்ததாக தெரிவிக்கப்படுகிறது.

📣 பயணிகளுக்கான அறிவுரை
SNCF, பயணிகளிடம் மிகுந்த எச்சரிக்கையுடன் நடந்து கொள்ளுமாறும், மாற்றுச் சேவைகள் குறித்த தகவல்களை உடனுக்குடன் அறிந்துகொள்ள அதிகாரப்பூர்வ SNCF பயன்பாட்டை (app) அல்லது தங்களின் இணையதளத்தை பயன்படுத்துமாறும் கேட்டுக் கொண்டுள்ளது.

‘வித்தியாசமான’ கேங்க்ஸ்டர் லுக், பஞ்ச் டயலாக்குகள், ஸ்டைலிஷ் ஆக்ஷன் இவை அனைத்தையும் தாண்டி, ‘அஜித்’ என்ற பெயரே இந்த திரைப்படத்தைப் பார்க்கச் சொல்லி ரசிகர்களை ஈர்க்கும் என்பது நிதர்சனமான உண்மை. இதை உணர்த்தவே முயற்சித்திருக்கிறது ஆதிக் ரவிச்சந்திரனின் “குட் பேட் அக்லி”.

கதை சுருக்கம்: ரெட் டிராகன் ரீஎன்ட்ரி
இந்தத் திரைப்படத்தில் “ரெட் டிராகன்” என்ற சக்தி வாய்ந்த கேங்க்ஸ்டராக தோன்றும் அஜித் 18 ஆண்டுகளுக்கு முன் தன் மனைவிக்கு கொடுத்த ஒரு வாக்குறுதியின் காரணமாக வன்முறையை விடுத்து சிறைக்குச் சென்றவர் தற்போது விடுதலையடைந்து வெளியே வந்த பிறகு தொலைந்து போன தனது மகனைத் தேடுகிறார். ஆனால் மகன் கிடைக்கவில்லை…. ரெட் டிராகன் ஏன் சிறைக்கு சென்றார்? அவரது குடும்பத்துக்கு என்ன நேர்ந்தது போன்ற கேள்விகளுக்கு பதிலே இந்த 138 நிமிடங்கள்.

விஜயின் கில்லி முதல் அஜித்தின் மங்காத்தா வரை மேற்கோள் காட்டப்பட்டுள்ள ஒரு கதைக்களமாக…..
படத்தின் ட்ரைலரிலிருந்தே ஒரு விஷயம் தெளிவாக இருந்தது – இது ஒரு ‘நாஸ்டால்ஜிக்’ ரைடு(நாம் திகட்ட திகட்ட பார்த்து ரசித்த திரைப்படங்களை மீட்டிப்பார்க்கும் ஒரு தொகுப்பாக)’அஜித் திலகமாக’ இருந்த காலகட்டத்திலிருந்து, சமீபத்திய மங்காத்தா வரை, அவருடைய பல ஹிட் படங்களை நினைவுபடுத்தும் காட்சிகளும், வசனங்களும், டயலாக்குகளும் இப்படத்தில் இடம் பெற்றிருக்கின்றன.

சில நேரங்களில் இது ரசிகர்களுக்கு ஒரு ஜொள்ளி ஃபீஸ்ட் போலத் தோன்றலாம். ‘காரப்பொரி’ காட்சி, ‘வில்லனுக்கே ஹீரோ மாஸ்’ மாதிரியான காட்சிகள், ‘மீண்டும் வந்து விட்டேன்’ என்ற பாணியில் வெறித்தனம் – எல்லாம் சேர்ந்து “அஜித் இன் பாஸ் இன் பேக்” என சொல்லும் அளவுக்கு உள்ளது.

பாரம்பரிய பிம்பத்துக்கு வலுச்சேர்க்கும் வகையில் த்ரிஷாவின் கதாப்பாத்திர வடிவமைப்பு…..
த்ரிஷா ஒரு மென்மையான பங்களிப்பை வழங்குகிறார். அவருடைய கதாப்பாத்திரம் மிக வலுவாக எழுதப்படவில்லை என்றாலும், முக்கியமான மற்றும் உருக்கமான தருணங்களில் தோன்றுகிறார். கூடவே அர்ஜூன் தாஸ், சுனில், பிரசன்னா உள்ளிட்டவர்கள் தங்கள் பங்களிப்பை வழங்கியுள்ளார்கள். யோகி பாபுவின் நையாண்டி சில இடங்களில் நன்றாக வேலை செய்கிறது.

தொழில்நுட்ப தரம்: இசை, ஒளிப்பதிவு, எடிட்டிங்
ஜி.வி. பிரகாஷ் இசையில் “ரெட்ரோ பீட்” மற்றும் “மாஸ் ரி-இமேஜினிங்” டிரெண்டை பின்பற்றியிருக்கிறார். சில பாடல்கள் திரைப்படத்தில் பாடல் உண்டு என்ற அளவிற்கு வைக்கப்பட்டிருக்கின்றன. ஒளிப்பதிவாளர் அபிநந்தன் ராமானுஜன, அஜித்தை புதிய பரிணாமத்தில் காட்ட முயற்சித்திருக்கிறார். வெயிடிங், ஸ்லோ மோஷன் ஷாட்கள், வீசி வரும் மழைபோல் பொழியும் பஞ்ச் காட்சிகள் என அத்தனையும் விழா போலவே. எடிட்டிங் வழக்கத்தைவிட வேகமாக ஓடுகிறது, ஆனால் சில இடங்களில் கதை அதிக வேகமோ என்று தோன்ற வைக்கிறது.

விமர்சன பார்வை – வெறுமனே ஏற்கனவே வெளியான திரைப்படங்களை மேற்கோள்காட்டி செதுக்கப்பட்டது போல் தோன்றுகிறதோ என்கிற அபாயம்?
தினமணி – “இந்த படம் முழுக்க முழுக்க அஜித்துக்கே ஒதுக்கப்பட்டிருக்கிறது. அவரின் பாணி, தோற்றம், ஃபைட்டுகள், பேச்சு – அனைத்தும் ரசிகர்களுக்கு தீவிர விசில் பாணி.”
இந்தியன் எக்ஸ்பிரஸ் – “பழைய ஹிட் காட்சிகளை மீண்டும் நினைவுபடுத்தும் முயற்சியாகவே படம் அமைந்துள்ளது. இது ஒரு புதிய கதைக்காக அல்ல. ஆனால் ரசிகர்களுக்கான ஒரு உணர்வுப் பயணம்.”
இந்து தமிழ் திசை – “ஒரு கட்டம் வரை, நாஸ்டால்ஜியா ஒரு இன்ப அனுபவமாக இருக்கிறது. ஆனால் படம் முழுக்க அதன் மீதே ஏறி ஓடும்போது, அது ஒரு சலிப்பாக மாறுகிறது. கதை இயக்கம் ஒரு பக்கம், ரெஃபரன்ஸ் ஓவர்டோஸ் ஒரு பக்கம்.”

‘குட் பேட் அக்லி’ – இது ஒரு கதாபாத்திரம் கொண்ட புது முயற்சி இல்லை. ஆனால், அஜித்தின் ரசிகர்களுக்கான ஒரு விருந்து என்பதில் மாற்றமில்லை. ‘மங்காத்தா’, ‘வாலி’, ‘பில்லா’ – எந்த படங்களை ரசித்தீர்களோ, அதற்கான நுணுக்கமான குறிப்புகள் இங்கே நிறையவே இருக்கின்றன. ஆனால், புதிய பார்வையாளர்களுக்கு இது ஒரு ‘டெஜா வு’ அனுபவமாக மாறக்கூடும்.

ரேட்டிங்: 3.25/5 – “அஜித் ரசிகர்கள் கொண்டாடும் சரவெடியாக; மற்றவர்கள் சற்று கூர்ந்து கவனித்து புரிந்து கொள்ள வேண்டிய அனுபவமாக. “

பிரான்ஸில் குழந்தைகள் இறப்பு விகிதம் கடந்த சில ஆண்டுகளில் தொடர்ந்து அதிகரித்து வருவது பற்றிய கவலைக்கிடமான தரவுகள் தற்போது வெளியாகியுள்ளன. 2024 ஆம் ஆண்டில் மட்டும், ஒரு வயதுக்குட்பட்ட 2,700 குழந்தைகள் உயிரிழந்துள்ளனர் என்று பிரான்ஸின் தேசிய புள்ளிவிவர நிறுவனம் INSEE (Institut National de la Statistique et des Études Économiques) தெரிவித்துள்ளது.

இந்த புள்ளிவிவரத்தின் அடிப்படையில், ஒவ்வொரு 1,000 குழந்தை பிறப்புக்கும் 3.5 குழந்தைகள் பிறந்த பிறகு உயிரிழக்கின்றனர். இது ஐரோப்பிய நாடுகளின் சராசரியைவிட மிகவும் அதிகமாகும். ஐரோப்பிய யூனியனில் பல நாடுகளில் 1,000 குழந்தைகளுக்கு 2க்கும் குறைவாகவே குழந்தை இறப்பு விகிதம் காணப்படுகிறது. ஆனால் பிரான்ஸ் மட்டும், வளர்ந்த நாடாக இருந்தாலுமே, இவ்வளவு மோசமான குழந்தை இறப்பு விகிதத்தை வைத்திருப்பது என்பது நாட்டு மக்களிடையே மிகுந்த அதிர்ச்சியையும் கவலையையும் ஏற்படுத்தியுள்ளது.

பிரான்ஸில் குழந்தை இறப்பு விகிதம் அதிகமாகக் காணப்பட காரணங்கள் என்ன?
குழந்தைகளின் உயிரிழப்பிற்கு பல்வேறு காரணங்கள் குறிப்பிடப்பட்டுள்ளன:
👉பிறப்பில் ஏற்படும் சிக்கல்கள் (complications at birth)
👉மரபணு குறைபாடுகள்
👉முந்தைய ஆண்டுகளில் அதாவது 2019 தொடக்கம் 2024 வரையிலான காலப்பகுதிகளில் மருத்துவ வசதிகள் பற்றாக்குறையாகக் காணப்பட்டமை.
👉சமூக மற்றும் பொருளாதார பின்னணிகள்.
இவை அனைத்தும் சேர்ந்து குழந்தை உயிரிழப்பை அதிகரிக்கச் செய்துள்ளதாக மருத்துவர் சமுதாயம் மற்றும் ஆராய்ச்சியாளர்கள் தெரிவித்துள்ளனர்.

இதுவரை கிடைக்கப்பெற்ற தரவுகளின்படி ஆண் குழந்தைகளே அதிகளவில் உயிரிழப்பதாக தெரிவிக்கப்படுகிறது. இது குழந்தை பிறக்கும் நேரத்தில் ஆண் குழந்தைகளுக்கு ஏற்படும் உடல் நலச்சிக்கல்களின் சாத்தியம் உயர்வாக இருப்பதன் விளைவாக இருக்கலாம்.

ஒவ்வொரு 250 குழந்தைகளிலும் ஒரு குழந்தை தனது முதலாவது பிறந்த நாளை கடக்கும் முன்னரே உயிரிழக்கிறது, என்ற தகவலும் வெளியாகியுள்ளது. இது ஒரு நாட்டின் சுகாதார துறையின் நிலை பற்றிய கேள்விகளை எழுப்புகிறது.

இந்தக் குழந்தை இறப்பு விகிதம் 2011 முதல் தொடர்ந்து உயர்ந்து கொண்டே வருகிறது. இதற்கான தீர்வாக, பிரான்ஸ் அரசு தற்போது நவீன சுகாதார நடவடிக்கைகளை திட்டமிட்டு வருகிறது. இதன் மூலம் இனி பிறக்கும் குழந்தைகளுக்கான மருத்துவ பராமரிப்பு தரத்தை மேம்படுத்தும் நோக்கில் பல திட்டங்கள் செயல்படுத்தப்பட இருக்கின்றன.

பாரிஸ் நகரத் திட்டமிடல் நிறுவனம் (Apur) சமீபத்தில் குளிர்சாதனக் கருவிகளின் பயன்பாடு குறித்து மேற்கொள்ளப்பட்ட ஒரு விரிவான ஆய்வின் முதல் பகுதி முடிவுகளை வெளியிட்டுள்ளது. ஒருகாலத்தில் ஆடம்பர வசதியாகக் கருதப்பட்ட இந்தக் கருவிகள், தற்போது பாரிஸில் வீடுகள், அலுவலகங்கள், கடைகள் என பல்வேறு கட்டடங்களில் சாதாரணமாகப் பயன்படுத்தப்படுகின்ற பொருட்களாக மாறியுள்ளன. இருப்பினும், இந்த வளர்ச்சிகளுடன் சேர்ந்து பக்கவிளைவுகளும் கூடவே வளர்ந்து வருகின்றன. குளிர்சாதனங்கள் உள்ளே எவ்வளவு இதமாக குளிர்ச்சியை வழங்குகின்றனவோ அதற்கு அதிகமாக சூழலுக்கு வெப்பத்தை வழங்குகின்றன.

குளிர்சாதனங்கள் உள்ளே ஏற்படுத்தும் குளிரின் அளவுக்கு ஏற்ப வெப்பத்தை வெளியேற்றுகின்றன. பல கட்டடங்களில், இந்த வெப்பம் நேரடியாக தெருக்களில் வெளியேற்றப்படும் வகையில் அந்த குளிர் சாதனங்கள் பொருத்தப்பட்டுள்ளன. இதனால், குறிப்பாக கோடை இரவுகளில், நகரம் தானாகக் குளிர வேண்டிய நேரத்தில் கூட அதிக வெப்பம் நிலவுகிறது.

ஜூலை மாதத்தின் வழமையான நாளொன்றை கற்பனை செய்து பாப்போம் சூரியன் கூரையையும் சாலையையும் சுட்டெரிக்கும் அந்த பகல் பொழுது முழுவதும் கடந்த பின்னர் குளிர்ச்சியான இரவுக்காக காத்திருப்போம் இரவும் சுட்டெரித்தால் ? இரவு வேளையில் நீங்கள் ஜன்னலைத் திறந்து இதமான குளிர் காற்றை சுவாசிக்க நினைக்கிறீர்கள் ஆனால் துரதிஷ்டவசமாக கீழே உள்ள வீட்டில் பொருத்தப்பட்டுள்ள குளிர்சாதனத் தொட்டியிலிருந்து வரும் சூடான காற்று உங்களது அறைக்குள் புகுந்து விட்டது இப்பொழுது உங்களது உணர்வு ஏவாறிருக்கும்?

இது ஒரு “சூழல் வீழ்ச்சி” என்று நகரத் திட்டமிடல் நிபுணர்களும் சுற்றுச்சூழல் ஆர்வலர்களும் குறிப்பிடுகின்றனர். இந்த கருவிகள் நகரின் வெப்பத்தை அதிகரிப்பதோடு மட்டுமல்லாது, ஒலி மாசுபாடு, அதிக மின்சார நுகர்வு போன்ற பாதகமான விளைவுகளையும் ஏற்படுத்துகின்றன.

இந்தக் கருவிகளின் விரிவான பயன்பாடு ஒரு சுழற்சி சிக்கலை உருவாக்குகிறது: வெப்ப நிலை அதிகரிக்கிறது → மக்கள் குளிர்சாதனத்தை அதிகம் பயன்படுத்துகிறார்கள் → வெளியே வெப்பம் அதிகரிக்கிறது → மேலும் AC தேவைப்படுகிறது. இந்தத் தொடரும் சுழற்சி, குளிர்ச்சியைத் தேடி செல்லும் முயற்சியால் நகரத்தை மேலும் மேலும் வெப்பமடையச் செய்கிறது.

Apur ஆய்வின்படி, தற்போதைய இந்த நிலை தொடருமானால், பாரிஸ் கோடை காலங்களில் மின்சார தேவையை சமாளிக்க கடுமையாகப் போராட வேண்டிய சூழ்நிலை ஏற்படும். ஏற்கனவே, நகரத்தின் சில பகுதிகளில், இரவிலும் வெப்பநிலை குறைவடையாத நிலை உருவாகியுள்ளது.

இந்த நெருக்கடிக்கு பதிலாக, பாரிஸ் நகரம் பல நடவடிக்கைகளை முன்னெடுத்து வருகிறது.
👉பாஸிவ் குளிர்சாதனக் கட்டிடங்கள்: இயற்கை காற்றோட்டம், பசுமை கூரைகள், நிழல் சுவர்கள், வெப்பநிலைத் தடுப்பு போன்ற வடிவமைப்புகள் ஊக்குவிக்கப்படுகின்றன.
👉பசுமை நகர அமைப்பு: மரங்கள், பூங்காக்கள், பசுமை வளிகள் மூலம் நகர சூட்டைப் பராமரிக்க இயற்கையான முறைகள் நாடப்படுகின்றன.

👉AC நிறுவல் ஒழுங்குமுறை: பொதுமக்கள் அடர்ந்த பகுதிகளில் AC கருவிகள் வெப்பத்தை நேரடியாக வெளியேற்றக்கூடிய அமைப்புகள் தவிர்க்கப்பட வேண்டும் என்பதற்காக புதிய விதிமுறைகள் பரிசீலிக்கப்படுகின்றன.

👉மாவட்ட குளிர்சாதன மையங்கள்: தனித்தனி கருவிகளுக்குப் பதிலாக, ஒரு பிரதேசத்திற்கே மையமாய் இயங்கும் குளிர்சாதன அமைப்புகள் அமைக்கப்படுகின்றன.

பெரும்பாலான நாடுகளில், குளிர்சாதனம் நவீன வசதியின் அடையாளமாகவே பார்க்கப்படுகிறது. ஆனால், அதைத் தவிர்க்க வேண்டிய சூழ்நிலை நம்மை நோக்கி வருகின்றது. மக்கள் மனதில் மாற்றம் ஏற்படுத்த வேண்டியுள்ளது. AC-ஐ பொறுப்புடன் பயன்படுத்தும் பழக்கங்களை வளர்த்தல் மட்டுமன்றி, மாற்று தீர்வுகளின் மீது நம்பிக்கை வைக்க வேண்டிய அவசியம் உள்ளது.

வெப்பநிலைகள் ஆண்டாண்டாக உயரும் வேகத்தில் நகரங்கள் எடுக்கும் முடிவுகள் எதிர்கால வாழ்வாதாரத்தை தீர்மானிக்கின்றன. “நாம் உள்ளே குளிர்ச்சியடைய, நகரமே வெப்பப்பட வேண்டுமா?” என்பதே இந்நேரத்தில் எழும் முக்கியமான கேள்வி.

பலஸ்தீனை ஜூன் மாதத்தில் அங்கீகரிக்கவுள்ளதாக பிரான்ஸ் ஜனாதிபதி இம்மானுவேல் மக்ரோன் ஏப்ரல் 9-ஆம் தேதி ஒரு பிரஞ்சு தொலைக்காட்சிக்கு வழங்கிய நேர்காணலில் தெரிவித்தார். இது மேற்கு ஆசியா தொடர்பான பிரான்ஸின் வெளிநாட்டு கொள்கையில் ஒரு முக்கியமான மாற்றத்தை வெளிப்படுத்துவதாக உள்ளது.

“சவூதி அரேபியா மற்றும் பல நாடுகளுடன் இணைந்து ஜூன் மாதத்தில் ஒரு மாநாட்டை நடத்தும் நோக்கத்துடன் இருக்கிறோம். இதன் விளைவாக பலஸ்தீனை அங்கீகரிக்க முடியும்,” என மக்ரோன் கூறினார்.

இக்கருத்து, பிரான்ஸின் இரு-மாநில தீர்வு (Two-State Solution) முயற்சிக்கு வலுசேர்க்கும் வகையில் முன்வைக்கப்படுகிறது. இது, இஸ்ரேலுடனும் பலஸ்தீனுடனும் சமாதானமாக இணைந்து வாழும் இரண்டு தனி நாடுகளை உருவாக்கும் தீர்வாகும்.

பலஸ்தீனிய ஆட்சி அமைப்பு (Palestinian Authority) இதை வரவேற்று, “பஸ்தினிய மக்களின் உரிமைகளை பாதுகாக்கும் பாதையில் இது முன்னேற்றமான ஒரு கட்டமாகும்” என்று குறிப்பிட்டது.

தற்போது, ஐக்கிய நாடுகள் அமைப்பில் உள்ள 193 நாடுகளில் 147 நாடுகள் பஸ்தீனை அங்கீகரித்துள்ளன. கடந்த 2024 மே மாதத்தில் ஸ்பெயின், ஐர்லாந்து மற்றும் நோர்வே ஆகிய நாடுகளும் இதில் சேர்ந்தன. ஆனால் அமெரிக்கா, இங்கிலாந்து, ஜெர்மனி போன்ற பல மேற்கு நாடுகள் இன்னும் அங்கீகாரம் வழங்கவில்லை.

பிரான்ஸ் எடுத்துள்ள இப்புதிய நடவடிக்கையானது, மற்ற ஐரோப்பிய நாடுகளின் முடிவை மாற்றும் வகையிலும், உலகத் தரத்தில் பலஸ்தீனின் அரசியல் நிலையை உயர்த்தும் வகையிலும் அமையலாம். இதன் போது மக்ரோன் மேலும் ஒரு முக்கிய தகவலை பகிர்ந்தார். பலஸ்தீனை அங்கீகரிப்பதோடு, சில மத்திய கிழக்கு நாடுகள் இஸ்ரேலை அங்கீகரிக்க வாய்ப்பு உள்ளது எனவும் குறிப்பிட்டார்.

தற்போது, எகிப்து, ஜோர்டான், ஐக்கிய அரபு எமிரேட்ஸ் போன்ற சில அரபு நாடுகள் இஸ்ரேலை அங்கீகரித்துள்ளன. ஆனால் சவூதி அரேபியா, ஈரான், ஈராக், சிரியா மற்றும் யெமன் போன்றவை இன்னும் அங்கீகரிக்கவில்லை. இதில் சில நாடுகள் இஸ்ரேலை அங்கீகரிப்பது, மத்திய கிழக்கில் புதிய உரையாடல் வாய்ப்புகளை ஏற்படுத்தக்கூடும்.

இது இஸ்ரேல் மற்றும் பாலஸ்தீனுக்கான சம உரிமைகளை வழங்கும் நோக்கத்திலான ஒரு இரட்டை அங்கீகார முயற்சி எனக் கொள்ளலாம்.

இந்த முயற்சிக்கு எதிராக பல சவால்கள் உள்ளன. நிலப்பகுதிகளைப் பற்றிய தகராறுகள், பாலஸ்தீனியர்களுக்குள் உள்ள உட்பகைகள், மற்றும் இஸ்ரேல் அரசின் கடுமையான நிலைப்பாடு போன்றவை இது சாத்தியமா என்பதில் கேள்விக்குறி எழுப்புகின்றன.

மேலும், பிரான்ஸின் இந்த நடவடிக்கை, இஸ்ரேல் மற்றும் அமெரிக்காவுடன் மோதல்களை ஏற்படுத்தும் வாய்ப்பும் உள்ளது.

பிரான்ஸ் ஒரு அமைதி அமைப்பாளராக இந்த முயற்சியில் ஈடுபடுவதை, பல நாடுகள் மாற்றத்திற்கான ஒரு அறிகுறியாகப் பார்க்கின்றன. ஐ.நா. பாதுகாப்பு கவுன்சிலின் நிரந்தர உறுப்பினராகவும், ஐரோப்பிய ஒன்றியத்தில் முக்கிய பங்கு வகிப்பவராகவும், பிரான்ஸின் நடவடிக்கை பலஸ்தினிய அரசியல் நிலைக்கு மேலும் வலுவூட்டும்.

இந்த முயற்சி மூலம், பல ஆண்டுகளாக நிலைத்திருந்த அமைதி முயற்சிகளில் ஏற்பட்ட தளம்பல் நிலையை மாற்றும் புதிய வழி உருவாகலாம்.

Aubervilliers இல் மருந்து ஊழியர் ஒருவரிடம் இருந்து €100,000 யூரோக்கள் கொள்ளையடிக்கப்பட்டுள்ளது. இது தொடர்பில் பொலிஸார் தீவிர விசாரணையில் ஈடுபட்டுள்ளனர். சம்பவம் குறித்து மேலும் தெரியவருவதாவது.
Aubervilliers, France இல் மருந்தகத் தொழிலாளி ஒருவர் தனது நிறுவன வங்கிக்கணக்கில் வைப்புச் செய்வதற்காகப் பணத்துடன் சென்றபோது, ​​அவரை இருவராக வந்த கொள்ளையர்கள் தாக்கி, அவரிடமிருந்து €100,000 யூரோக்கள் கொள்ளையடித்துத் தப்பிச் சென்ற சம்பவம் பரபரப்பை ஏற்படுத்தியுள்ளது.

இந்த சம்பவம், ஏப்ரல் 8, செவ்வாய்க்கிழமை அன்று, மாலை 4:15 மணியளவில், Avenue de la République வீதியில் இடம்பெற்றுள்ளது. பாதிக்கப்பட்ட நபர், Pantin (Seine-Saint-Denis) நகரில் உள்ள ஒரு மருந்தகத்தில் பணியாற்றும் ஊழியர் எனக் குறிப்பிடப்பட்டுள்ளது. சம்பவம் நிகழ்ந்த போது, அவர் நிறுவனம் சார்ந்த பணத்தை வங்கியில் வைப்புச் செய்ய சென்றிருந்தார்.

பாதிக்கப்பட்டவர் வங்கியின் அருகே சென்றுகொண்டிருந்தபோது, இரு கொள்ளையர்கள் அவரை வழிமறித்து தாக்கியுள்ளனர். தாக்குதலின் போது, அவர் தாக்கி வீழ்த்தப்பட்ட நிலையில், அவரிடம் இருந்த பணப்பையை பறித்துக்கொண்டு, கொள்ளையர்கள் மோட்டார்சைக்கிளில் தப்பிச் சென்றதாக காட்சியிடப்பட்டுள்ளது.

சம்பவம் தொடர்பில் உடனடியாக Seine-Saint-Denis காவல் துறை துரிதமாக நடவடிக்கை எடுத்து, பாதிக்கப்பட்ட நபரிடம் வாக்குமூலம் பெற்றுள்ளனர். அருகிலுள்ள கண்காணிப்பு கேமராக்களில் பதிவு செய்யப்பட்ட வீடியோக்கள் தற்போது ஆய்வு செய்யப்பட்டுவருகிறது. மேல் நீதிமன்றத்தின் ஒத்துழைப்புடன், தாக்குதலின் பின்னணியில் உள்ள காரணிகள் மற்றும் சந்தேக நபர்களை அடையாளம் காண முயற்சி மேற்கொள்ளப்பட்டுவருகிறது.

பணம் மற்றும் பெறுமதிமிக்க பொருட்களை வெளியில் எடுத்துச் செல்லும் நிறுவன ஊழியர்கள், மேலும் பாதுகாப்பான முறைகளில் பண பரிவர்த்தனை செய்ய வேண்டும் என அதிகாரிகள் அறிவுறுத்தியுள்ளனர். குறிப்பாக, பாதுகாப்பு அம்சங்களுடன் கூடிய பணவாகனங்களைப் பயன்படுத்தும் மருந்தகங்கள் மற்றும் சிறு நிறுவனங்கள், சிக்கல்களை தவிர்க்கும் நோக்கில் முன்னெச்சரிக்கையாக நடந்து கொள்ள வேண்டும்.

இதுவரை குற்றவாளிகள் பிடிபடவில்லை. சம்பந்தப்பட்ட வழக்கு தொடர்பாக மேலதிக தகவல்களை வழங்கக்கூடியவர்கள், 93 காவல் நிலையம் அல்லது Crimestoppers France என்ற அமைப்பை தொடர்புகொண்டு தகவல்களை பகிரலாம்.

2025 ஆம் ஆண்டில் வரிகள் அதிகரிக்கப்படமாட்டாது: நிதி அமைச்சர் எரிக் லோம்பார்ட் உறுதியளிப்பு
பாராளுமன்றத்தில் நாட்டின் பட்ஜெட் தாக்கல் நிகழ்வின்போது, நாட்டின் வளர்ச்சி விகிதம் 0.9% ஆக இருந்தது. எனினும், உலகளாவிய மற்றும் உள்ளூர் பொருளாதார சூழ்நிலைகளில் ஏற்பட்ட நிச்சயமற்ற தன்மை காரணமாக, வளர்ச்சி கணிப்பை 0.7% ஆகக் குறைத்துள்ளதாக பொருளாதாரம் மற்றும் நிதி அமைச்சர் எரிக் லோம்பார்ட் (Eric Lombard) அறிவித்தார்.

இதுபற்றி அவர் தெரிவிக்கையில் “நாட்டின் நன்மையை கருத்தில் கொண்டு இந்த மாற்றம் செய்யப்பட்டுள்ளது. நாங்கள் நாட்டின் பற்றாக்குறையை சமாளிக்க தேவையான நடவடிக்கைகளை எடுப்போம். ஆனால் அதற்காக வரிகளை அதிகரிக்கவேண்டும் என்பதில்லை. நாங்கள் தற்போதைய நிதி நிலைமையை மேலும் மோசமாக்க விரும்பவில்லை.”

இந்த அறிவிப்பு, அமெரிக்க ஜனாதிபதி டொனால்ட் டிரம்ப் விதித்த வரிகள் காரணமாக சர்வதேச வர்த்தகத்தில் ஏற்பட்ட குழப்பத்தையும், நாட்டின் பொருளாதாரத்தில் அதனால் ஏற்பட்ட சீர்கேடுகளையும் தொடர்ந்து வெளியாகியுள்ளது.

மேலும், 2025 ஆம் ஆண்டுக்கான பொதுச் செலவினங்களில் பாராளுமன்றம் நிறைவேற்றிய பல கட்டணங்களும் வளர்ச்சி வீதத்தைக் குறைக்கும் என ஏற்கனவே சில பொருளாதார நிபுணர்கள் எச்சரித்திருந்தனர். இருந்தும், வரிகளை உயர்த்துவது தற்போதைய சூழ்நிலையில் சிறந்த தீர்வாக இருக்காது என அமைச்சர் தெளிவாக கூறியுள்ளார்.

அதனை தொடர்ந்து, நிதி அமைச்சர் மேலும் தெரிவிக்கையில்:
“நாங்கள் செலவினங்களை சீரமைக்கும் முயற்சியை மேற்கொண்டு வருகிறோம். வருமானத்தை உயர்த்துவது என்பது ஒரே வழியல்ல. நாம் விரைவில் புதிய பொருளாதார உத்திகளை அறிமுகப்படுத்த உள்ளோம்.” என்று கூறினார்.

‘புஷ்பா: தி ரூல்’ என்ற திரைப்படத்தின் உலகளாவிய வெற்றிக்குப் பிறகு, தேசிய விருதையும் வென்ற அல்லு அர்ஜுன், ‘ஜவான்’ என்ற 1000 கோடி ஹிட் படத்தை இயக்கிய அட்லீயுடன் கை கோர்க்கிறார். ‘AA22xA6’ எனத் தற்காலிகமாக பெயரிடப்பட்டுள்ள இந்த திரைப்படம், அல்லு அர்ஜுனின் பிறந்த நாளான ஏப்ரல் 8ஆம் தேதி 2025 அன்று உத்தியோகபூர்வமாக அறிவிக்கப்பட்டது.

‘புஷ்பா: தி ரூல்’ வெற்றிக்கு பிறகு அல்லு அர்ஜுனின் புதிய பயணம்
Rs 1,800 கோடியை உலகம் முழுவதும் வசூலித்து, ‘புஷ்பா: தி ரூல்’ இந்திய சினிமாவின் வரலாற்றில் முக்கிய இடத்தை பிடித்தது. இதன் மூலம், தேசிய அளவில் சிறந்த நடிகர் விருதைப் பெற்ற முதல் தெலுங்கு நடிகராக அல்லு அர்ஜுன் உருவெடுத்தார். இப்போது, இந்திய சினிமாவின் மிக நம்பிக்கைக்குரிய இயக்குனர்களில் ஒருவரான அட்லீயுடன் இணைந்து, அவர் இன்னொரு பரபரப்பான பயணத்தை ஆரம்பிக்க உள்ளார். இது ஒரு மாஸ் பான்இண்டியா(pan-India film) திரைப்படமாக உருவாகும் என எதிர்பார்க்கப்படுகிறது.

பல பிரம்மாண்ட ஹிட் படங்களை உருவாக்கிய சன் பிக்சர்ஸ் நிறுவனம், 2025 ஏப்ரல் 8ஆம் தேதி இந்தப் படத்தை அதிகாரப்பூர்வமாக அறிவித்தது. X (Twitter) தளத்தில், “Gear up for the Landmark Cinematic Event #AA22xA6 – A Magnum Opus from Sun Pictures” எனும் அறிவிப்புடன், @alluarjun @Atlee_dir #SunPictures #AA22 #A6 என்ற ஹாஷ்டாக்களும் வெளியிடப்பட்டன. ரசிகர்கள் பெரும் உற்சாகத்துடன் இந்த கூட்டணியை கொண்டாடிக் கொண்டிருக்கிறார்கள். வெளியான ஃபர்ஸ்ட் லுக் போஸ்டர், மாஸ், ஆக்‌ஷன் மற்றும் வியக்கத்தக்க ஷாட்கள் நிறைந்த ஒரு மிகப் பெரிய திரைப்பட அனுபவத்தை இந்த திரைப்படம் கொடுக்கும் என எதிர்பார்க்கப்படுகிறது.

‘AA22xA6’ என தற்காலிகமாக பெயரிடப்பட்டுள்ள இந்த படம், அல்லு அர்ஜுனின் 22வது படம் மற்றும் அட்லீயின் 6வது இயக்குநர் முயற்சியாகும். இருவருமே இந்திய சினிமாத்துறையில் சாதனைகளை எட்டியவர்கள் என்பது சினிமா வட்டாரங்களின் தற்போதைய கிசுகிசுப்பு. ரூ.500 கோடி பட்ஜெட்டில் இப்படம் உருவாகவுள்ளது எனவும் இது இந்தியாவில் உருவாகும் மிகச் சிறந்த, விலையுயர்ந்த படங்களில் ஒன்றாகும் எனவும் பரவலாக பேசப்படுகிறது. இதனால், பல மொழிகளில் இப்படம் பாக்ஸ் ஆஃபிஸ் சாதனைகளை ஏற்படுத்தும் என வியாபார நிபுணர்கள் எதிர்பார்க்கின்றனர்.

விஷேஷ காட்சிகள், விஷுவல் எஃபெக்ட்ஸ், பிரம்மாண்டம்
படத்தின் தொடக்கக் காட்சிகளை கொண்ட ஒரு டீசர் வீடியோவும் வெளியிடப்பட்டது. இந்தப் படம் விஞ்ஞானம், ஆக்‌ஷன் மற்றும் ஃபேண்டஸி கலந்த ஒரு தனிப்பட்ட வகையை சேர்ந்தது என கூறப்படுகிறது; அதில் சுபாவிக (supernatural) மற்றும் அயல்வாழி (alien) அம்சங்களும் இடம்பெறுகின்றன. பிரபல விஷுவல் எஃபெக்ட்ஸ் நிறுவனமான Lola VFX இதில் பணியாற்றுவதாக தகவல்கள் தெரிவிக்கின்றன. இந்தியாவின் நான்கு திசைகளிலுமுள்ள ரசிகர்கள் இதில் சேரும்காட்சியாக, இந்த படம் இந்திய சினிமாவின் அடுத்த மாபெரும் விழாவாக உருவாகும் என எதிர்பார்க்கப்படுகிறது.